Головкиннің бұрынғы қарсыласы ауыр дерттен қайтыс болды
Ванес Мартиросян (36-4-1, 21 KO) өз дәуірінің мықтыларымен жұдырықтасқан боксшы еді
Аса танымал армян-америкалық боксшы, әлем чемпиондығына үміткер Ванес Мартиросян жексенбі күні 39 жасында қайтыс болды. Соңғы екі жыл ол тері обырымен күрескен, деп хабарлайды Sports.kz.
Мартиросян (36-4-1, 21 KO) өз дәуірінің мықтыларымен жұдырықтасқан боксшы еді: ол рингке Эрисланди Ларамен (екі рет), Деметриус Андраде және Джермелл Чарло сияқты чемпиондарға қарсы шыққан. 2018 жылы орта салмақ чемпионы Геннадий Головкиннен алған ерте жеңілістен кейін ол кәсіби мансабын аяқтаған болатын. Ол Кассим Оума, Уилли Нельсон және Ише Смит секілді қарсыластарды айқын жеңген.
Арменияда туған Мартиросян бала кезінде АҚШ-қа қоныс аударып, Глендейлде өсті. Мұнда оның үлкен армян жанкүйер қауымы қалыптасты. Ол 2004 жылғы Олимпиадада АҚШ құрамасының намысын қорғап, келесі жылы кәсіби боксқа өткен.
Рингтегі стилі мен мінезі оған «Қорқыныш» деген лақап ат әкелген: Мартиросян HBO және Showtime эфирлерінде үздік боксшылармен нағыз тартысты айқастар өткізді. Оны бокстың танымал мамандары — Фредди Роуч, Ронни Шилдс, Джо Гуссен, Эдмонд Тарвердян және өмірлік жақын досы Рома Калантарян жаттықтырған.
Калантарян соңғы сәттерінде оның жанында болғанын айтып, ауыр жаңалықты бөлісті:
«Ванес өз өмірі үшін чемпион сияқты күресті. Оның өмірден өткенін айту — аса қайғылы. Бар мүмкін емді қолданды, тіпті Мексикаға да барды. Соңғы алты айы өте ауыр өтті. Соңғы кездескенімде ол уақыттың аз қалғанын сезіп тұрған. Маған отбасын аманат етті. Ванес — жүрегі алтын адам еді. Оның жаны тыныштық тапсын».
Марқұмның артында жары мен балалары қалды.