Олимпиада чемпионы атанған ресейлік боксшы мәлімдеме жасады
Боксшы уақытша үзіліс алмақ
Токио Олимпиадасының чемпионы, ресейлік боксшы Альберт Батырғазиев кәсіби мансабына уақытша үзіліс жасады. 27 жастағы спортшы бұл туралы өз Instagram парақшасында жазба жариялады.
Өткен жылдың шілде айында Батырғазиев өзінің соңғы жекпе-жегінде британдық Джеймс Диккенске төртінші раундта техникалық нокаутпен жеңілген еді. Осылайша ол кәсіби рингте алғаш рет жеңіліске ұшырап, WBA уақытша чемпиондық титулынан айырылған болатын.
«Бокс мен үшін өмірдің үлкен бөлігі болып келеді. Бірінші жеңіліс көптеген нәрсені басқа қырынан қарауға мәжбүр етті. Енді өз уақытымды ұзақ жоспарлаған жобаларға, мысалы, туған аймақтардағы спорт инфрақұрылымын дамытуға арнаймын», - деп жазды боксшы.
Алайда Батырғазиев спорттан толық қол үзуге ниет білдірмей, боксты алда толық жалғастыратынын жеткізді.
«Мен бокспен қош айтысамын деп ойламаймын, тек «көріскенше» деймін. Бұл жаңа кезең де адал әрі мақсатты болады», – деді ол.
Альберт Батырғазиев 2020 жылдан бері кәсіби рингте 13 жекпе-жек өткізіп, 12 жеңіске жетті. Ол Токио Олимпиадасында 57 кг салмақта сын түсіп, топ жарған. Ол Ресей боксшылары арасында Олимпиада чемпионы атанған әзірге соңғы боксшы.