«Чемпион шығаруға болады». Василий Жиров отандық боксшыларға не жетіспейтінін айтты
Ол өзі білетін әдіс-тәсілдерді үйретуге дайын екенін атап өтті
1996 жылғы Олимпиада чемпионы Василий Жиров «Бірінші бол» YouTube-арнасына сұхбат беріп, отандық боксшыларға не жетпейтінін алға тартты.
Тілші Жировтен боксшыларға физикалық даярлық жағынан қандай кеңес беретінін сұраған.
«Ол үшін арнайы жаттығулар бар. Қалай жаттығу жасағанымды көрсете аламын. Кәсіпқой боксқа бет бұрғанда, маған бірнеше әдісті көрсетті, жаттығу кезінде соларды әлі күнге дейін қолданамын. Айтып, көрсету керек десе, мен дайынмын. Бірақ мұндай жаттығулар бәріне бірдей келеді деп айту қиын, көбісі залдан қашып кетіп, мүлде оралмауы мүмкін. Себебі ондай жаттығуларға жұрттың бәрі эмоционалдық тұрғыда дайын бола бермейді. Сөйте тұра адамға ойлауды, дұрыс дайындалуды үйретсе, кез келген жақсы боксшыдан чемпион шығаруға болады. Егер ол дайын болса, соңына дейін күреседі. Мұндайда сенің эмоционалдық тұрғыда даярлығың өте маңызды. Егер дайын болмасаң, онда мұнда сен істейтін шаруа жоқ. «Физика» белгілі бір деңгейге жеткен соң аяқталады, ал эмоция адамды алға жетелейді», - деді ардагер боксшы.
Естеріңізде болса, 2024 жылғы Олимпиада ойындарында қазақстандық боксшылар барлық жеті салмақта бақ сынап, тек бір күміс медаль еншіледі.