Әлем чемпионаты: Диас Берікбай өзбек боксшысынан жеңіліп қалды
Әзірге тек бір боксшымыз ғана финалға шықты
Черногорияның Будва қаласында өтіп жатқан бокстан жастар арасындағы әлем чемпионатының жартылай финалдық жекпе-жектері өтіп жатыр. 48 келіде ел намысын қорғаған Диас Берікбай өзбек боксшысынан жеңіліп, қола жүлдегер атанды.
Жартылай финалға дейін Диас Венесуэла, Сербия және Испания боксшыларын жарыс жолынан шығарған болатын. Алайда, финал үшін болған айқаста өзбек боксшысы Сабировтан 0:5 есебімен ұтылды.
Айта кетейік, бүгін қыздар құрамасынан төрт боксшысымыз рингке шығып, олардың үшеуі жеңілді және біреуі финалға шықты. Атап айтқанда, Әнел Абдрасилова (48 кг) Мексика боксшысына жол берді. Бағжан Отынбай (52 кг) да жартылай финалда сүрініп, әлем чемпионатының қола жүлдегері атанды. Ал, Аружан Жаңабаева (63 кг) Ирландия боксшысынан ұтылды.
Әзірге тек Аружан Зейноллаева (81 кг) ғана финалға жолдама алды. Жартылай финалдық сында ол поляк қызын жеңген болатын. Енді әлем чемпионы атану үшін өзбек боксшысы Рухшона Парипиевамен жұдырықтасады.