Әлем чемпионы атанған қазақ боксшыларына қанша сыйақы берілгені белгілі болды
Жарыстың жалпы жүлде қоры жарты миллион доларды құрады
Черногорияда аяқталған бокстан жастар арасындағы әлем чемпионатының жеңімпаздары мен жүлдегерлеріне қанша сыйақы берілгені белгілі болды.
Еске салайық, аталған чемпионатта Қазақстан құрамасы 6 алтын, 1 күміс және 10 қола медаль иеленіп, жалпыкомандалық есепте бірінші орын алды.
Әлем чемпионатын ұйымдастырған Халықаралық бокс қауымдастығы (IBA) бұған дейін жүлде қорының 500 мың доллар екенін хабарлаған болатын. Сәйкесінше, I орынға – 8 000 доллар, II орынға – 4 000 доллар және III орынға – 2 000 доллар тағайындалған. Ал, ширек финалға шыққан боксшылардың әрбіріне 1 000 доллардан сыйақы берілді.
Осылайша, Қазақстан құрамасы елге 73 мың доллармен оралады: бірінші орын алғандар – 48 мың, екінші орын – 4 мың және үшінші орын алғандар 20 мың доллар иемденген. Сондай-ақ, біздің құрамадан ширек финалда жеңілген жалғыз боксшы 1 мың доллар еншілеп отыр.