UFC Садриддин Ахмедовке жоғары баға беріп, жекпе-жек уақытын жариялады
Отандасымыз америкалық Рафаэль Игбоквемен (17-5, 7 КО) кездеседі
UFC Fight Pass бірінші орта салмақта өнер көрсететін қазақстандық боксшы Садриддин Ахмедовтың (14-0, 12 КО) келесі жекпе-жегін жариялады.
13 желтоқсанда Санта-Инез қаласында (Калифорния штаты, АҚШ) Ахмедов Hollywood Fight Nights сериясындағы шоудың басты жекпе-жегінде америкалық Рафаэль Игбоквемен (17-5, 7 КО) кездеседі.
«13 желтоқсан! Садриддин Ахмедов қайта оралады! Бұл ойынның ең үздік әрі мықты боксшыларының бірі! Қапы қалмаңыздар!», – делінген UFC Fight Pass-тың әлеуметтік желілердегі хабарламасында.
Айта кетсек, Садриддин Ахмедовтың промоутері ретінде Геннадий Головкинмен бірге жұмыс істеген белгілі промоутер Том Леффлер қызмет етеді. Қазіргі уақытта GGG-дің бұрынғы бапкері Абель Санчестің басшылығымен жекпе-жекке дайындық жүргізіп жатыр. Ал Hollywood Fight Nights турнирлер сериясын Леффлер UFC президенті Дана Уайтпен бірлесіп ұйымдастырады.