«Жатқан жерің жайлы болсын»: Данияр Елеусінов WBC чемпионына сес көрсетті
Отандасымыз америкалық Марио Барриосты жекпе-жекке шақырған
Жартылай орта салмақтағы қазақстандық кәсіпқой боксшы, Олимпиада чемпионы Данияр Елеусінов (12-0, 7 КО), өзінің келесі қарсыласы ретінде WBC чемпионы америкалық Марио Барриосты (27-2, 18 КО) атады.
Данияр әлеуметтік желіде Барриосты жекпе-жекке шақырып, чемпиондық титул үшін бақ сынауға дайын екенін мәлімдеді. Қазақстандық боксшының сөзінше, бұл жекпе-жек оның мансабындағы маңызды қадам болмақ.
«Екі апта бұрын мен сені жекпе-жекке шақырдым. Бірақ сен әлі де үнсіз отырсың. Қайдасың? Менен жасырынба. Соңғы жекпе-жегімде мен WBC Peace белбеуін жеңіп алдым. Ал менімен кездескеннен кейін сен «Жатқан жерің жайлы болсын» белбеуін аласың, ал мен сенің WBC Әлем чемпионы белбеуіңді тартып аламын», – деп жазды Данияр Елеусінов.
Айта кетейік, америкалық Марио Барриос WBC белбеуін қазан айында жеңіп алып, оны қорғау үшін қарсылас іздеп жатыр.