Канелоға Жәнібек Әлімханұлы мүлдем қызық емес – сарапшы
Қазақ боксшысы қазір доминикалық Карлос Адаместі жекпе-жекке көндіре алмай жүр
Орта салмақта IBF және WBO тұжырымдары бойынша әлем чемпионы Жәнібек Әлімханұлы (17-0, 12 КО) даңқты мексикалық боксшы Сауль Альваресті (62-2-2, 39 КО) бірнеше жылдан бері жекпе-жекке шақырып келеді. Алайда, әзірге тек әлеуметтік желіде ғана.
«Канелоның» өзі бұл шақыртулардың бірде-біріне реакция да білдірмеген. Десе де, қоғамда қос боксшының болашақ жекпе-жегі туралы алып-қашпа әңгіме көп. Осыған байланысты америкалық бокс сарапшысы Рик Глейзер пікір білдірді.
«Әлімханұлы мен Канело арасында жекпе-жек болуы мүмкін бе? Әрине, жоқ. Канелоға бұл мүлдем қызық емес, оған Жәнібекпен жұдырықтасу ешқандай пайда әкелмейді», - деді ол Legalbet.kz тілшісіне берген сұхбатында.
Айта кету керек, қазақ боксшысы орта салмақта жұдырықтасса, мексикалық екінші орта және жартылай ауыр салмақтарда жекпе-жектер өткізіп жүр. Екінші орта салмақта әлемнің абсолютті чемпионы болған.
Жәнібек соңғы рет рингке 5 сәуірде Астанада шығып, франциялық Анауэль Нгамиссенгені бесінші раундта нокаутпен жеңді.
Сауль Альварес болса 4 мамырда тағы да екінші орта салмақта әлемнің абсолютті чемпионы атағы үшін жекпе-жек өткізеді. Бұл жолы ол кубалық Уильям Скаллмен жұдырықтаспақ.