Умар Кремлев Сербияда беделді турнир өткізбек

Халықаралық бокс қауымдастығының (IBA) президенті Умар Кремлев пен Сербия басшысы Александр Вучич 2027 жылы Белградта өтетін ірі шараларды ұйымдастыру мәселесін талқылады.
Кездесуде тараптар ЭКСПО-2027 көрмесі мен IBA аясында әлем чемпионаты жекпе-жектерін өткізу жоспарын талқылаған.

«Белградта Сербия президенті Александр Вучичпен кездестім. Біз 2027 жылы өтетін ауқымды ЭКСПО іс-шарасын талқыладық. Осы оқиға аясында IBA PRO EXPO әлем чемпионы атағы үшін және IBA BARE KNUCKLE чемпиондық жекпе-жектерін ұйымдастыру жоспарланып отыр. Қазір Белградтағы инфрақұрылым жоғары деңгейде дайындалып жатыр. Тарихтағы ең үздік ЭКСПО мен ең тартысты IBA турнирлеріне куә боласыздар», - деп жазды Кремлёв әлеуметтік желіде.

Айта кетейік, әлемдік ЭКСПО-2027 көрмесі 15 мамыр мен 15 тамыз аралығында өтеді. Оған 120-дан астам мемлекет қатысатыны жоспарланған.
Естеріңізде болса, жақында ғана IBA әуесқой бокстан әлем чемпионаты өтетінін мәлімдеді. Айтулы аламан Дубайда өтеді деп жоспарланған және жүлде қоры 8 млн доллар болады деген хабар тарады.