«Ордабасы» легионерге қомақты бонустар тағайындаған

Желіде Кабо-Верде футболшысы Жоао Паулиньо мен «Ордабасы» футбол клубы арасында биылғы 1 шілдеде жасалған еңбек келісімшартының қосымша келісімі тарады. Бұл туралы ASnews.kz сайты мәлімдеді.

Құжаттағы мәліметке сәйкес, клуб ойыншыға ай сайын 5 422 222 теңге жалақы төлейді (салық ұсталғаннан кейін – 4 880 000 теңге). Сонымен қатар «Ордабасы» футболшыға қосымша төлемдер, соның ішінде еңбек демалысының пайдаланылмаған күндері үшін өтемақы тағайындаған. Оның жалпы көлемі – 16 733 333 теңге (салықтан кейін – 15 060 000 теңге). Бұл қаражат 31 тамызға дейін төленуі тиіс болған.

Айта кетейік, тек ағылшын және орыс тілдерінде дайындалған құжатқа екі тарап – клуб президенті Асхат Сейсембек пен футболшы Жоао Паулиньо қол қойған. Бір қызығы, құжаттың ағылшын тіліндегі нұсқасында клуб президенті ретінде «Ордабасының» бұрынғы басшысы Бауыржан Әбдібайытовтың аты көрсетілген.