Роналду Испаниядағы емін аяқтап, Сауд Арабиясына қайтты
Футболшы Мадридке жеке дәрігеріне қаралу үшін барған
Португалиялық шабуылшы Криштиану Роналду жарақатынан кейінгі емін аяқтап, Испаниядан Сауд Арабиясы еліне қайта оралды. Бұл туралы «Аль-Наср» клубы мәлімдеді.
Бұған дейін «Аль-Наср» тарапы Роналдудың 28 ақпан күні «Аль-Фейхаға» қарсы өткен матчта сан бұлшықетінің артқы бөлігінен жарақат алғанын мәлімдеген болатын.
«Қайта оралғаныма қуаныштымын», - деп жазды футболшы Instagram-дағы ресми парақшасында.
Клубтың бас бапкері Жорже Жезуш футболшының Мадридке жеке дәрігеріне қаралу үшін барғанын айтқан еді. Қазіргі маусымда 41 жастағы Роналду 26 матчта 22 гол соғып үлгерді.
«Аль-Наср» Сауд Арабиясы чемпионатында 26 турдан кейін көш бастап келеді. Олар «Аль-Хиляль» клубынан үш ұпай алда тұр. Клуб келесі ойынын 3 сәуір күні «Аль-Наджмаға» қарсы өткізеді.