Кабо-Верде алғашқы әлем чемпионатында сенсация жасап, плей-оффқа шықты
Соңғы турда Кабо-Верде мен Сауд Арабиясы құрамалары тең тарқасты
2026 жылғы футболдан әлем чемпионатының H тобындағы соңғы турда Кабо-Верде мен Сауд Арабиясы құрамалары тең тарқасты.
АҚШ-тың Хьюстон қаласындағы «Эн-Ар-Джи» стадионында өткен кездесу 0:0 есебімен аяқталды.
Матч барысында Кабо-Верде құрамасы шабуылда белсендірек болды. Африкалық команда 15 соққы жасап, қарсыласы небәрі жеті рет қақпаға бағытталған соққы орындады. Дегенмен қақпаға дәл тиген соққылар саны бойынша Сауд Арабиясы басым түсті – 3:2.
Кабо-Верде қақпашысы Возинья тағы бір мәрте өз қақпасын голдан аман сақтап, 40 жастан асқан қақпашылар арасындағы ерекше жетістікке қол жеткізді.
Бұған дейін мұндай нәтижеге Англия өкілі Питер Шилтон мен Италия аңызы Дино Дзофф қана жеткен.
Бұл тең ойыннан кейін Кабо-Верде үш ұпай жинап, қосымша көрсеткіштер бойынша топта екінші орынға ие болды. Осылайша команда өз тарихындағы алғашқы әлем чемпионатында-ақ плей-офф кезеңіне жолдама алды. Енді 1/16 финалда олар турнирдің қазіргі чемпионы Аргентина құрамасымен кездеседі.
Ал Сауд Арабиясы екі ұпаймен топтағы төртінші орынды иеленіп, қосымша көрсеткіштер бойынша Уругвайдан қалып қойды. Екі құрама да әлем чемпионатындағы өнерін аяқтады.