Рамазан Оразов екі ай алаңға шықпайтын болды

«Елімайдың» капитаны және жартылай қорғаушысы Рамазан Оразов УЕФА Конференциялар лигасының бірінші іріктеу кезеңінде Арменияның «Алашкерт» командасына қарсы өткен кездесуде жарақат алып, 17-минутта алаңнан кетуге мәжбүр болды. Оның орнына колумбиялық шабуылшы Дубан Паласио шыққан еді.

Белгілі болғандай, Еревандағы матчта Оразов сіңірін үзіп алған. Осы жарақатына байланысты тәжірибелі футболшы шамамен екі ай бойы жасыл алаңнан тыс қалады.

Осылайша Қазақстан құрамасының жартылай қорғаушысы «Алашкертке» қарсы қарымта матчты өткізіп алады. Бұл жағдай «Елімайдың» бас бапкері Андрей Карпович үшін үлкен шығын болмақ.

Еске салсақ, командалар арасындағы алғашқы кездесу 1:1 есебімен тең аяқталған болатын. Қарымта ойын Қазақстанда өтеді.