«Оңтүстік Кореяда интимдік қызмет көрсетілген»: Жапония 4 төрешіге қатысты тергеу бастады
Оқиға 2011–2012 жылдары Оңтүстік Кореяда өткен жеті матчқа қатысты
Жапония футбол қауымдастығы (JFA) Оңтүстік Кореяда қызмет атқарған төрт жапондық төрешіге қатысты тергеу бастады. Оларға төрешілік қызмет атқарған кезде «жыныстық сипаттағы қызметтердің» ақысын қабылдауы мүмкін деген күдік бар.
Тергеуге Оңтүстік Кореяның MBC телеарнасында 8 тамызда шыққан материал себеп болған. Телеарна 2016 жылғы Оңтүстік Корея Мәдениет, спорт және туризм министрлігінің аудит есебіне сілтеме жасаған. Құжатта Корей футбол қауымдастығы (KFA) шамамен он шетелдік төрешіге осындай қызметтерді төлегені көрсетілген. Олардың арасында жапондық төрешілер де болған.
MBC мәліметінше, оқиға 2011–2012 жылдары Оңтүстік Кореяда өткен жеті матчқа қатысты. Олардың арасында әлем чемпионатының іріктеу ойындары да бар. Төрешілерге Сеул, Ульсан және басқа қалалардағы массаж салондарының қызметтері үшін төлем жасалған. Шығындар KFA-ның корпоративтік банк карталары арқылы жүргізілген.
Қызығы, аты аталған жапондық төрешілердің бірі әлі күнге дейін JFA құрамында жұмыс істейді және қауымдастықтың төрешілер комитетінің мүшесі саналады.
Сондай-ақ MBC 2012 жылғы әлем чемпионатының Азия аймағындағы үшінші іріктеу кезеңінде Оңтүстік Корея мен Кувейт арасындағы кездесуге төрелік еткен төрт жапондық төрешінің екеуі массаж қызметін пайдаланғанын хабарлады. Ол ойында Оңтүстік Корея 2:0 есебімен жеңіске жетіп, іріктеудің финалдық кезеңіне жолдама алған.
Аудит есебінде көрсетілген жеті матчтың үшеуі әлем чемпионаты немесе Олимпиада ойындарының іріктеу кездесулері болса, қалған төртеуі жолдастық сипатта болған.
JFA қазіргі таңда осы ақпаратты тексеріп, жағдайға қатысты тергеу жүргізіп жатыр. Қауымдастық тергеу нәтижесін кейін жариялауды жоспарлап отыр.