Дэвид Бекхэм 100 млн еуроға Францияның танымал клубын сатып алуы мүмкін

Англия құрамасы мен «Манчестер Юнайтедтің» бұрынғы жұлдызы Дэвид Бекхэм футболдағы бизнесін Еуропаға кеңейтуі мүмкін. Қазір «Интер Майамидің» тең иелерінің бірі саналатын Бекхэм Франция клубын сатып алуға қызығушылық танытып отыр.

Ouest-France мәліметінше, клубтың қазіргі қожайындары команданы сату мүмкіндігін қарастырып жатыр. Әзірге үш әлеуетті сатып алушы бар. Олардың бірінің ұсынысы шамамен 100 миллион еуроға бағаланған.

Осы үміткерлердің арасында Дэвид Бекхэмнің де есімі аталып отыр. Басылымның жазуынша, ағылшын футболының аңызы бұл жобаға бұған дейін де қызығушылық білдірген. Оның өкілі жергілікті Collectif nantais бастамашыл тобының мүшелерімен кездесіп, ықтимал инвестиция мәселесін талқылаған.

Бекхэм үшін футбол клубына қаржы салу жаңа бағыт емес. Ол 2018 жылдан бері америкалық «Интер Майами» клубының тең иесі саналады. Соңғы жылдары Флорида командасы MLS-тегі ең танымал жобалардың біріне айналды.

Бекхэмнің жеке байлығы шамамен 1,36 миллиард еуроға бағаланады. Егер Франциядағы келісім жүзеге асса, бұл оның АҚШ-тан тыс футбол бизнесіндегі ең ірі жобаларының бірі болуы мүмкін.