Бақтиер Зайнутдинов «Бешикташтың» үздік ойыншысы болды
Дегенмен, оның командасы жеңіске жете алған жоқ
Қазақстандық жартылай қорғаушы Бақтиер Зайнутдинов ойнайтын «Бешикташ» клубы Түркия Суперлигасының 17-туры аясында «Аланьяспормен» кездесіп, тең ойнады (1:1).
Flashscore.com статистикалық сайты бұл матчтағы әрбір ойыншының өнеріне баға берген. Оның ішінде Зайнутдинов те бар. Жерлесіміз «Бешикташ» сапында негізгі құрамда алаңға шығып, 70-минутта оны өзге ойыншы алмастырды. Кездесу барысында қазақстандық Flashscore-ден 8,0 ұпай алған — бұл алаң иелерінің арасындағы ең жоғары, екі команда футболшыларының арасындағы екінші көрсеткіш.
Бұл маусымда Бақтиер Зайнутдинов «Бешикташ» сапында жеті матчқа қатысып, бір нәтижелі паспен көзге түсті. Соның ішінде үш ойында Бақтиер кездесу соңында ғана алаңға шығып, тек бірнеше минут өнер көрсетті.