Қытай ұлттық құрамасында 4 қазақ спортшы өнер көрсетеді
Олардың арасында Ақнәр Ардаққызы да бар
Қытай Халық Республикасының Харбин қаласында өтетін IX қысқы Азия ойындарына қатысатын спортшылардың тізімі жарияланды.
Синьхуа агенттігінің мәліметінше, Қытай құрамасында 257 адам бар, олардың 170-і спортшылар (85 ер, 85 әйел) болса, қалғаны бапкерлер мен өзге де қызметшілер.
Айта кететін жайт, спортшылар арасында Олимпиаданың 6 чемпионы бар. Тағы 147 спортшы Азия ойындарына алғаш рет қатысқалы отыр.
Құрамада ұлты қазақ 4 спортшы өнер көрсетеді, олар: Ақнәр Ардаққызы мен Қанағат Мұхамедұлы (конькимен жүгіру), Баян Жалынқызы мен Самғар Серікұлы (шаңғы).
Есте болса, Ақнәр Бейжің Олимпиадасына қатысқан болатын.
IX қысқы Азия ойындары 2025 жылдың 7-14 ақпаны аралығында өтеді. Спортшылар 11 спорт түрі бойынша 64 медаль жиынтығын сарапқа салады. Байрақты бәсекеге Қазақстаннан 139 спортшы қатысады.