Футболдағы пенальти тебу ережесі өзгеруі мүмкін
Жаңа ережеде қақпашыға басымдық беріледі
Аты аңызға айналған италиялық төреші Пьерлуиджи Коллина пенальти тебу ережесін өзгерту мәселесін көтерді.
ФИФА-ның төрешілер комитеті басшысы Пьерлуиджи Коллина пенальти тебу ережесіне қатысты мәлімдеме жасады. Оның ойынша, қазіргі уақытта 11 метрлік айып добын орындау форматы шабуылдаушы тарапқа көбірек басымдық береді.
Статистикаға сәйкес, қазіргі уақытта пенальтидің 75 пайызы голмен аяқталады. Коллинаның айтуынша, сейв жасалған кезде футболшының допты тағы да тебу мүмкіндігіне ие болуы қақпашыны қиын жағдайға түсіреді.
«Менің ойымша, футболшылар бұған шағымдануы керек. Бұл мәселені IFAB-мен де талқылаған болатынмын. Оның шешімі ретінде пенальти орындаушыға тек бір рет қана допты тебуге рұқсат етілуі мүмкін. Ойыннан кейінгі пенальти сериясы секілді. Егер оны қақпашы қайтарып, доп алаңда қалса, голкипер оны ойынға өзі қосуы керек», - деді Коллина.