Қазақстаннан кеткен Черчесовке 2,5 млн еуро жалақы ұсынылды
Дегенмен, ресейлік маман ешқашан ақшаға қызыққан емеспін дегенді айтып отыр
Футболдан Қазақстан құрамасының бұрынғы бас бапкері Станислав Черчесовке Ираннан ұсыныс түскен.
Аты аталмаған клуб ресейлік маманға жылына 2,5 миллион еуро шамасында жалақы төлейтін келісімшарт ұсынған. Бұл туралы «Футбол России» бағдарламасының жүргізушісі Илья Казаков айтып, сонан соң бұл жайында Черчесовтің өзінен нақтылады.
«Мен үшін ақша ешқашан мотивация болған емес. Рубль де ақша, оны да адал алу керек. Бұл жерде өзіндік мәселелер бар.
Әзірге Ресейдемін. Өз елімде жұмыс істесем деген ниетім бар. Сондықтан күте тұрамыз», - деді Черчесов «Россия 24» телеарнасының эфирінде.
Естеріңізде болса, Станислав Черчесов Қазақстан құрамасынан 2025 жылғы қаңтарда кетті. Оның басшылығымен құрама алты ойынның бесеуінде жеңіліс тауып, бірде-бір гол соға алмады.