Англияда оқып жүрген Елдос Сметов Уэльске барып, Қазақстан құрамасына жанкүйер болды (ВИДЕО)
Өкінішке қарай, Али Алиев шәкірттері бұл ойында жеңіліп қалды
Дзюдодан Париж Олимпиадасының чемпионы Елдос Сметов Уэльс – Қазақстан матчына жанкүйер ретінде барды. Сондай-ақ, даңқты балуан стадионнан қазақ халқын Наурыз мерекесімен құттықтады.
Еске салайық, биыл жыл басында Елдос Сметов Англияға қоныс аударып, тіл курсын оқуды бастап кеткен болатын.
«Ұлыстың ұлы күні Наурыз мерекесімен баршаңызды құттықтаймын. Еліміз аман, жұртымыз тыныш болсын! Әрқашан жеңісті күндеріміз көп болсын! Біздің елдің құрамасы жауапты матчқа келді. Қазір Уэлстеміз. Сәттілік тілеймін», - деді Сметов Instagram желісі арқылы.
Өкінішке қарай, аталған ойында Қазақстан құрамасы 1:3 есебімен жеңіліп қалды.
Енді Қазақстан футболшылары әлем чемпионатына іріктеу ойындары аясында 26 наурыз күні Лихтенштейнге қарсы ойын өткізеді.