ҚФФ президенті болудан бас тартқан Давид Лорияға жаңа қызмет берілді

Қазақстан футбол федерациясының бас хатшысы болып Давид Лория тағайындалды. Бұл қызметті бұған дейін Саян Хамитжанов атқарып, небәрі жарты жылдан кейін отставкаға кеткен болатын.

Давид Лорияның кандидатурасын ҚФФ-ның атқару комитеті мақұлдап, оны Бас хатшы лауазымына тағайындаған.

Еске салайық, былтыр жыл соңында ҚФФ президенттігіне сайлау болған кезде Давид Лория өз кандидатурасын ұсынған. Алайда, дауыс беруге бірер күн күн қалғанда ол кандидатурасын алып тастады.

Лория бір кездері Қазақстан құрамасының қақпашысы болған. Қазіргі таңда Астана қалалық мәслихатының депутаты. Әлеуметтік саланың дамуына қосқан үлесі үшін «Құрмет» орденімен марапатталған.

Ал, бұған дейін Бас хатшы болған Саян Хамитжанов Туризм және спорт министрінің кеңесшісі лауазымына тағайындалды. Ол енді еліміздегі футболдың және спорт инфрақұрылымдарының дамуына атсалыспақшы.