«Қайрат» жанкүйерлері клубқа бойкот жариялады

27 сәуір күні Алматыдағы Орталық стадионда Премьер-лиганың басты фавориттері арасында матч өтті.

Бұл кездесуге «Қайраттың» жанкүйерлер аймағының өкілдері келмеген. Сөйте тұра алматылық ұжым Қостанайдың «Тобылын» 2:1 есебімен жеңді.

Бұған Қазақстан чемпиондарының жанкүйерлерінің бойкот жариялауы себеп.

Алматы ұжымының белсенді жанкүйерлері бұл туралы ресми түрде жариялап, бұл әрекеттерін «Тобылмен» ойында паш етті. Ал жанкүйерлердің мұндай қадамға баруына клуб басшылығының олардың бастамаларын елемеуі себеп.

Жанкүйерлер ұзақ уақыт бойы конструктивті диалог орнатуға тырысқанын, Алматыдағы жанкүйерлік мәдениетті дамытуға қатысты түрлі ұсыныстар жасағанын және бүкіл қала мақтана алатындай атмосфера құруды көздегенін атап өтті. Алайда бұл бастамалардың ешбірі талқылаусыз-ақ қабылданбай тасталған.

«Біздің бойкот — «Қайраттан» бас тарту емес, бұл — жанкүйерлер қауымына көрсетілген әрекетсіздік пен құрметсіздікке қарсы наразылық. Біз құрмет көрсетуді сұрамаймыз, біз талап етеміз. «Қайрат» дегеніміз — бұл біз, жанкүйерлер, клубтың жүрегі», – делінген «Қайрат» ФК жанкүйерлерінің мәлімдемесінде.