Шымкентте бір жыл бұрын капсуласы салынған стадионның құрылысы әлі басталмаған ба?
Спорттық нысанның қашан аяқталатыны белгісіз
Былтыр Шымкент қаласының әкімі Ғабит Сыздықбековтің өзі капсуласын салған жаңа стадионның құрылысы әлі басталмапты. Бұл туралы белгілі спорт журналисі Ермұхамед Мәулен өзінің Instagram-парақшасында мәлімдеген. Дәлел ретінде ол жергілікті тұрғынның түсірген видеосын жариялады.
Видео авторы стадионның орны әлі күнге дейін қаңырап бос жатқанын айтады. Мұнда құрылыс жұмыстарының белгісі жоқ, техника түгілі құрылысшы адамдарды да таппайсың. Ал, қоршаудың сыртына жабысытырылған стадион плакаттары алынып тасталыпты.
«Бірінші бол» редакциясы аталған жайттың мән-жайын білу үшін Шымкент қалалық әкімдігіне сауал жолдайды.
Еске салайық, Шымкенттегі жаңа стадионның капсуласы былтыр маусым айының соңында салынған. Салтанатты шараға Ғабит Сыздықбековтен бөлек «Ордабасы» ФК-ның сол кездегі капитаны Асхат Тағыберген мен клуб президенті Асхат Сейсембек те қатысты.
Жаңа стадион 35 мың орынға шақталған. Қаланың «Тұран-2» шағын ауданында орналасады.