«Реал», «Барселона»? Бүгін «Қайраттың» қарсыластары анықталады

28 тамыз күні Монакода УЕФА Чемпиондар лигасының негізгі кезеңіне арналған жеребе тарту рәсімі өтеді. Дәл осы шара барысында алғаш рет топтық кезеңге шыққан алматылық «Қайраттың» қарсыластары анықталмақ.

Жеребе тарту рәсімі Астана уақытымен 21:00-де басталады.

Алматылық клуб биылғы маусымда іріктеу кезеңін сәтті өткізіп, қазақ футболының жаңа тарихын жазды:

• 1-раундта словениялық «Олимпияны» қос ойын қорытындысы бойынша 3:1 есебімен ұтты;

• 2-раундта финляндиялық «КуПС»-пен тартысты кездесуде камбэк жасап, 3:2 есебімен жеңді;

• 3-раундта словакиялық «Слованды» (1:1, пенальти – 4:3) жеңіп, сенсация жасады;

• Плей-офф кезеңінде шотландиялық «Селтикті» жарыстан шеттетіп (0:0, пенальти – 3:2), тарихи жетістікке жетті.

«Қайрат» — Чемпиондар лигасының негізгі кезеңіне шыққан Қазақстан тарихындағы екінші клуб. Бұған дейін 2015/16 маусымында ел намысын топтық кезеңде қорғаған клуб – «Астана» болатын.

Айта кетейік, бұған дейін алматылық команда тек Конференциялар лигасының топтық кезеңіне дейін жеткен еді.