«Реал» Алматыға мектеп құрамасымен келсе де жеңетін еді – Қуат Хамитов
«Реалдың» басшылығына жұлдыз ойыншыларын ала келудің қажеті болмағанын айтты
Қазақстандық аралас жекпе-жек шебері Қуат Хамитов Алматыда өткен Чемпиондар лигасының екінші турындағы «Қайрат» пен «Реал Мадрид» (0:5) матчы жайлы пікір білдірді.
Спортшы өзінің Instagram парақшасында «Қайрат» футболшыларының ойынын сынап, «Реалдың» басшылығына жұлдыз ойыншыларын ала келудің қажеті болмағанын айтты:
«Реал» басшылығы «бізге өз жұлдыздарымызды алып келмей-ақ, оларды мектеп құрамымен-ақ жеңуге болатын еді» деп ойлаған шығар. Иә, Акула жүзетін жерде балықтарға орын жоқ», – деп жазды ол.
Естеріңізге сала кетейік, Чемпиондар лигасының жалпы кезеңінің екінші турында алматылық «Қайрат» мадридтік «Реалдан» 0:5 есебімен ойсырай жеңілді. Килиан Мбаппе хет-трик жасап, Браим Диас пен Эдуардо Камавинга бір-бір голдан соқты.
Алматылықтар топтық кезеңде енді Кипрдің «Пафос», Италияның «Интер», Данияның «Копенгаген», Грекияның «Олимпиакос», Бельгияның «Брюгге» және Англияның «Арсенал» клубтарымен кездеседі. Бұл – «Қайраттың» алдына үлкен сынақтар күтіп тұрғанын көрсетеді.