«Барыс» қатарынан алтыншы матчта жеңілді

Құрлықтық хоккей лигасының кезекті туры аясында астаналық «Барыс» өз айдынында мәскеулік «Спартакты» қабылдаған. Ғалым Мәмбетәлиев шәкірттері кезекті рет жеңілді.

Жеңілістен көз ашпаған астаналық команда бұл ойында да аутсайдер саналды. Тиісінше 2:4 есебімен жеңілді.

Матчтың бірінші кезеңі 0:0 есебімен аяқталған. Командалар өткір шабуылдар ұйымдастырғанымен, гол соға алмады. Ал, екінші кезеңде «Барыстың» қорғанысы сыр беріп, жауапсыз үш шайба жіберіп алды. Шешуші үшінші кезеңде астаналық команда есін жиғанымен, есепте қуып жете алмады. «Барыс» сапынан алдымен Антон Бурдасов, кейін Әлихан Өмірбеков гол соқты. Алайда, матч аяқталуға 17 секунд қалғанда бос қақпаға «Спартак» ойыншысы Орлов шайбаны дәл бағыттап, ойын нүктесін қойды.

Осылайша Ғалым Мәмбетәлиев шәкірттері қатарынан алтыншы матчта жеңіліп, плей-офф кезеңіне шығудан үмітін үзгендей. 6 желтоқсанда «Барыс» «Северстальға» қонаққа барады.