Асу Алмабаев ACBJJ чемпиондық белбеуін жеңіп алды
Отандасымыз Тәжікстанның 13:0 рекорды бар файтерін жеңді
Қазақстандық UFC файтері Асу Алмабаев Ыстанбұлда өткен ACBJJ 22 турнирінде чемпиондық белбеуді жеңіп алды. Ол бразилиялық джиу-джитсу мен грэпплинг ережелері бойынша өткен титулдық белдесуде Тәжікстан өкілі Халим Назрулоевты жеңді.
60 келіге дейінгі салмақтағы All-Stars Title Match кездесуі No-Gi форматында, яғни кимонсыз өтті. Белдесу толық уақытқа созылып, төрешілердің бірауыздан шығарған шешімімен Алмабаевтың пайдасына аяқталды.
Оның қарсыласы Халим Назрулоев ММА-да әлі жеңіліп көрмеген. Оның еншісінде 13 жеңіс бар. Бұған дейін ол RCC және ONE ұйымдарында өнер көрсеткен.
Ыстанбұлдағы турнирге танымал жекпе-жек шеберлері де қатысты. Олардың қатарында UFC-дің бұрынғы чемпионы Белал Мухаммад, Брэндан Аллен, Юсеф Залал, Забит Магомедшарипов және Мухаммад Мокаев болды.
Айта кетейік, Алмабаев бір апта бұрын АҚШ-та өткен RAF 12 еркін күрес турнирінде де бақ сынаған. Ол америкалық Джонни ДиДжулиуспен кездесіп, шамамен бір жарым минутта мерзімінен бұрын жеңілген еді.
Ал қазақстандық файтердің ММА-дағы соңғы ресми жекпе-жегі маусым айында өтті. Алмабаев америкалық Чарльз Джонсонды үшінші раундта сабмишнмен жеңген болатын. Қазіргі таңда оның кәсіпқой ММА-дағы көрсеткіші — 24 жеңіс және 3 жеңіліс.