Шавкат Рахмонов алтын қолғаппен жаттығу жасап жүр
Спортшы дайындық барысын көрсетті
8 желтоқсан күні Лас-Вегаста ирландиялық Иэн Гэрримен айқасатын Шавкат Рахмонов қызу дайындық үстінде.
Спортшы өзінің даярлығынан суреттер жариялады, бұл жолы оның алтын түсті қолғаппен жаттығу жасап жүргенін көруге болады. Мұның UFC-ден келмегені анық, себебі ұйым спортшылардың экипировкасын кездесу аптасында ғана береді.
Шавкат өзінің әлеуметтік желідегі парақшасында «Алтын қолғапты кімге сыйлайын?» деп әзілдеді.
UFC-де алтын түсті қолғаптар биыл жазда пайда болды, әдетте оны чемпиондар ғана киіп төбелеседі. Алғаш болып осындай қолғаппен октагонға шыққан Ислам Махачев болды, ол 1 маусымда UFC 302 аясында Дастин Порьемен кездесу өткізген.
Айта кетейік, Шавкат Рахмонов — Иэн Гэрри айқасы UFC 310 турнирінде басты жекпе-жекке теңестірілген.