Иэн Гэрридің Шавкат Рахмонов туралы мәлімдемесі жұртты таң қалдырды
Екеуі санаулы күннен кейін октагонға шығады
Ирландиялық файтер Иэн Гэрри (15-0) мен қазақ Шавкат Рахмонов (18-0) жекпе-жек алдында трешток өткізудің орнына бірін-бірі мақтап жүр. Әсіресе, Гэрридің Рахмонов туралы айтқан жылы лебізі жұртты таң қалдырды.
Есте болса, бұған дейін ирландиялық файтер Шавкатпен бірге бір залда жаттыққанын еске алып, әлем чемпионы атағы бір-ақ адамға берілетініне өкінетінін айтқан еді. Енді ол алдағы төбелестен кейін де қазақ спортшысын сыйлап өтетінін айтты.
«Бұл айқас мен үшін өте маңызды. Себебі Шавкат өте талантты спортшы. Мен оны шын құрметтеймін. Бірге жаттығу жасадық, енді октагонды бөлісеміз. Бір-бірімізді ұрсақ та, құрметті жоғалтпаймыз. Оны менен бұрын біреудің төпелеп тастағанын қаламаймын», - деді Гэрри.
Айта кетейік, Шавкат Рахмонов пен Иэн Гэрри 8 желтоқсан күні Лас-Вегастағы UFC 310 турнирінде кездеседі.