Иэн Гэрри Шавкат Рахмоновты қазақша құттықтады
Ол мансабында алғаш рет жеңілді
Шавкат Рахмоновтан жеңілген ирландиялық файтер Иэн Гэрри қарсыласын қазақ тілінде құттықтады. Қазақша мәтінді ол өзінің Instagram-парақшасында жазған.
Еске салайық, Лас-Вегаста өткен UFC 310 турнирінде Шавкат Рахмонов пен Иэн Гэрри рейтингтік жекпе-жек өткізіп, бес раундтың нәтижесінде қазақ файтері жеңіске жеткен болатын.
«Сізді және таланттарыңызды құрметтеуден басқа ештеңем жоқ. Құттықтаймын, мен сені қайта көретін уақытты асыға күтемін – сіз де, мен де кімнің қауіптірек жауынгер екенін жақсы білеміз», - деп жазылған Гэрридің Instagram-парақшасында.
Айта кетейік, ирландиялық файтер бұған дейін мүлдем жеңілмеген. Енді оның есебінде 15 жеңіс пен 1 жеңіліс бар. Ал, Шавкат болса бұған дейінгі 18 жекпе-жегінің бәрінде мезгілінен бұрын жеңсе, Гэрриді төрешілер шешімімен ұтты.