Асу Алмабаевтың айқасынан соң UFC-ге ереже өзгерту ұсынылды
Жекпе-жек кезінде Капе Алмабаевтың көзін шұқып алған
Аса жеңіл салмақта UFC чемпиондығына бұрынғы үміткер Эл Яквинта португалиялық Манел Капе (21-7) мен қазақстандық Асу Алмабаев (21-3) арасындағы айқасқа қатысты пікір білдірді.
Екеуара жекпе-жек Лас-Вегастағы UFC Fight Night 253 турнирінің басты айқасы ретінде өтіп, Капенің техникалық нокаутымен аяқталды.
Үшінші раундта қарсыласы Алмабаевтың көзін шұқып алғанымен, рефери Майк Белтран ешқандай ескерту жасаған жоқ. Нәтижесінде Манель жұмысын жалғастырды.
«Неге олар көзден шұқуға рұқсат бере салмайды екен? Егер көзден шұқуға рұқсат берілсе, мұндай жайт қайталанбаушы еді», - деп жазды Яквинта әлеуметтік желідегі парақшасында.
Айта кетейік, Алмабаев UFC-де бірінші рет жеңіліс тауып отыр. Асудың бұған дейінгі көрсеткіші 4-0 болатын.