Шавкат Рахмонов октагонға қашан шығады
Қазақстандық файтердің жаттықтырушысы мән-жайды айтты
Қазақстандық UFC жекпе-жек шебері Шавкат Рахмоновтың жаттықтырушысы Эдуард Базров спортшының келесі жекпе-жекке қай уақытта оралатынын айтып берді. Бұл туралы Bookmaker-ratings.ru жазды.
Базровтың айтуынша, Рахмонов қазіргі таңда тізесіне жасалған операциядан кейін оңалтудан өтіп жатыр.
Шавкаттың тізесіне операция жасалды. Енді оған екі-үш айлық толық қалпына келу мерзімі қажет. Содан кейін жекпе-жекке қайта ораламыз деп отырмыз. Күздің соңына қарай немесе желтоқсанда қайтып келуді жоспарлап отырмыз, – деп мәлімдеді ол «Спорт Шредингера» Telegram-арнасына берген сұхбатында.
30 жастағы Рахмонов ММА-де 19 жекпе-жек өткізіп, барлығында жеңіске жеткен. Оның соңғы жекпе-жегі 2024 жылдың 7 желтоқсанында UFC 310 турнирінде өткен болатын. Сол кездесуде қазақстандық спортшы ирландиялық Иэн Мачадо Гэрриді төрешілердің бірауыздан шығарған шешімімен жеңген еді.
Шавкаттың октагонға оралуы жанкүйерлер үшін асыға күтетін сәттердің бірі болмақ.