«Сені ешкім ойламайды»: Шавкат Рахмонов өзіне қандай сыйлық алғанын көрсетті
Файтерге жанкүйері «Елге UFC белбеуін алып келсең, 100 жылқы менен» деп пікір қалдырған
UFC-де ел намысын қорғап жүрген Шавкат Рахмонов өзіне жаңа Mercedes-Benz Gelandewagen көлігін сатып алды. Спортшы бұл қуанышын Instagram-да бөлісті.
«Өзіңе өзің осылай сыйлық жасап тұрмасаң ешкім сені ойламайды», – деп жазды Рахмонов.
Рахмоновтың оқырмандары белсенді пікір жазып, жылы лебізін білдірді. Тіпті, жанкүйерінің бірі «Елге UFC белбеуін алып келсең, 100 жылқы менен» деп пікір қалдырған.
Mercedes-Benz-тің Қазақстандағы ресми өкілдіктерінде мұндай көліктің бастапқы бағасы шамамен 103 миллион теңгені құрайды.
Айта кетейік, UFC-дегі алғашқы қазақстандық Шавкат Рахмонов өзін бұрынғыдай «аш емес» деп сынағандарға жауап берді. Ол Ulysmedia.kz сайтына берген сұхбатында жекпе-жекке ұзақ уақыт шықпай жүргенінің себебін де түсіндірді.
«Бұл – ішкі мотивацияны түсінбеген адамдардың сөзі деп білемін. Егер менде ынта болмаса, спортты баяғыда-ақ тастаған болар едім. Ал мен мақсат қойдым, сол жолмен келе жатырмын», – деді Рахмонов сұхбатында.