Геннадий Головкин Ұлттық олимпиада комитетін қанша уақыт басқаратынын айтты

Орта салмақтағы бұрынғы әлем чемпионы, Ұлттық олимпиада комитетінің президенті Геннадий Головкин әйгілі америкалық бокс комментаторы Кевин Айолиге сұхбат берді. Боксшы Ұлттық олимпиада комитетін қанша уақыт бойы басқаруға ниетті екенін атап айтты.

Әйгілі бокс комментаторы Головкинге  “Бұл жұмысты, мәселен, келесі олимпиадалық циклде жалғастыру жоспарыңызда бар ма? Тек бокста ғана емес, басқа спорт түрлерінен де нәтиже, жағдайды жақсартуға тырысу үшін Қазақстанды спортты дамытудың қозғаушы күшіне айналдыруға тырысу керек пе?”, – деп сұрақ қойды.

Иә, қазір көріп жүргенім, салаға келгенім маған ұнайды. Маған сіздің  спорттың барлық түрінен сұрақ қоятыныңыз ұнайды. Мен ҰОК-қа бокс үшін ғана келмедім. Бокс – мен өз елімнің атынан көрсете алатын спорт түрлерінің бірі ғана. Мен бұл жерге шенеунік немесе саясаткер ретінде емес, спортшы ретінде келдім. Мен спорттың барлық түріне қызығамын. Мені барлық спортшылар, әсіресе Олимпиадаға қатысып, еліміздің атынан шығып жүргендер қызықтырады. Мен спорттың барлық түрінен спортшылар өздеріне лайықты нәрсені алғанын қалаймын. Олар құр қалмау үшін, армандарына жетуге мүмкіндік алғанын қалар едім. Ал, дәл қазір мен келесі циклге дейін қалатыныма сенімдімін, – деп жауап берді ол.

Айта кетейік, Геннадий аталған қызметке ақпан айында Тимур Құлыбаевтың орнына сайланған болатын.