Спортшы Париждегі олимпиадаға қатысу үшін саусағын кестірді

Көгалдағы хоккейден Австралия құрамасының мүшесі Мэттью Доусон Париждегі Олимпиада ойындарының алдында оң қолының саусағын ампутациялады.

Спортшы мұндай қадамға өз мамандығына деген махаббатына байланысты барған. ХОК мәліметінше, хоккейші оң қолының аты жоқ саусағын сындырып алған. Доусон зақым келген саусағының бөлігін гипстеудің орнына, оны ампутациялау туралы шешім қабылдаған.

«Бұл қадамға саналы түрде бардым, оның алдында хирургпен ақылдастым. Бұл Олимпиада үшін ғана емес, алдағы өмірім үшін де жасалған қадам. Саусағымның үстіңгі бөлігін кесіп тастау дұрыс шешім болды. Тез арада қалыпқа келемін деп үміттенемін», - деді Мэттью Доусон.

Токиодағы Олимпиада ойындарында Доусон Австралия құрамасы сапында күміс жүлдегер атанған.Доусон алғаш рет ауыр жарақат алып тұрған жоқ, алты жыл бұрын ол хоккей таяқшасы көзіне тиіп, жанарынан айырылуына сәл қалған.
27 шілде күні Австралия Парижде Рио олимпиадасының чемпионы Аргентинамен кездеседі.