«Спорт министрлігі мен ҰОК жұмысында олқылық көп»: Тоқаев спортқа бөлініп жатқан миллиардтар туралы айтты
Ол сондай-ақ, федерациялардың жұмысын да ретке келтіруді тапсырды
Ақордада отандық Олимпиада жүлдегерлерін қабылдаған мемлекет басшысы Қасым-Жомарт Тоқаев елдегі спорт саласында проблеманы көптігін айтты. Ол Спорт министрлігі мен Ұлттық Олимпиада комитетінің, сондай-ақ федерациялардың жұмысына көңілі толмайтынын жеткізді.
Мемлекет басшысының айтуынша, соңғы бес жылда жоғары жетістіктер спортына шығын екі есе өскен, бірақ соған лайық нәтиже жоқ.
«Салалық министрлік, Ұлттық олимпиада комитеті, өңірлердегі спорт басқармалары мен федерациялардың жұмысында олқылық көп әрі өзара үйлесімді жұмыс жоқ деп санаймын. Қазіргі жағдайға қарағанда, спорт функционерлері саланы дамытумен емес, миллиардтаған бюджет қаржысын игерумен әлек. Олар түпкі нәтижеге бас ауыртпайды. Спорт саласында жемқорлық фактілері жиі кездеседі. Бұл тек отандық спорттың дамуына ғана емес, елдің абырой-беделіне нұқсан келтіреді. Мұндайға жол беруге болмайды», – деді Қасым-Жомарт Тоқаев.
Бұл ретте Президент бүгінде әр өңір қандай спортты қолдайтыны туралы шешімді өз бетінше қабылдайтынын сынға алды. Үкіметке жағдайды бақылауға алып, спортқа қатысты мекемелердің барлық деңгейіндегі басқару вертикалін қалпына келтіру жөнінде тапсырма берді. Сонымен қатар еліміздің спорт қауымдастығы мен шетелдерде Ұлттық олимпиада комитетінің беделін көтеру туралы міндет жүктеді.