Еліміздің екі дзюдошысы әлем чемпионатының қоласы үшін белдеседі

Душанбеде жастар арасында өтіп жатқан әлем чемпионатында қазақстандық екі дзюдошы қола үшін күресуге мүмкіндік алды.

Тәжікстан астанасында дзюдодан жастар арасындағы әлем чемпионаты жалғасуда. Маңызды турнирдің үшінші жарыс күнінде Қазақстан құрамасынан 81 келіде Азат Күмісбай мен 90 келіде Асқар Біржанов үшінші орын үшін белдесуде татамиге шығады.

Азат Күмісбай әлем чемпионатының қола жүлдесі үшін тәжікстандық Сунатулло Мусоевпен белдессе, 90 келіде Асқар Біржанов Молдова спортшысы Вадим Гнимбовщимен сарапқа салады.

Бұған дейін еліміздің жастар құрамасынан 60 келіде белдескен Талғат Орынбасар әлем чемпионатының екі дүркін қола жүлдегері атанған болатын.