Нұрқожа Қайпанов әлем чемпионатының финалына өтті
Жәмила Бақбергенова бүгін ӘЧ алтыны үшін күреседі
Тиранада күрес түрлерінен олимпиадалық емес салмақ дәрежелері бойынша өтіп жатқан әлем чемпионатында Нұрқожа Қайпанов финалға шықты.
Еркін күрестен 70 келіде сынға түскен Қайпанов жартылай финалда Тәжікстан балуаны Абдулмажид Кудиевті 12:2 есебімен уақытынан бұрын ұтты. Осылайша отандасымыз ертең финалда жапон спортшысы Йошиносуке Аоягимен өзара сынға түседі.
Нұрқожа Қайпанов іріктеу кезеңдерінде Израиль, Молдова, Грузия балуандарының барлығын айқын жеңін, кездесулерді уақытынан бұрын аяқтады.
Ол осыдан 5 жыл бұрын Астанада өткен әлем чемпионатында 70 келіде финалға шыққан еді.
Бұдан бөлек, бүгін сынға түскен Асыл Айтақын (61 кг), Дәулет Ергеш (79 кг), Нұрдәулет Бекенов іріктеу кезеңдерінде есе жіберді. Егер Дәулет Ергештен басым түскен үнді балуаны финалға шықса, онда отандасымыз жұбаныш белдесуіне мүмкіндік алады.
Сонымен бірге, бүгін әйелдер күресінен Жәмила Бақбергенова 72 келіде финалда күреседі.
Бұған дейін грек-рим күресінен 63 келіде Ержет Жарылқасында финалға шығып, күміс жүлдегер атанған болатын.