Әлем чемпионатында жүлде алған Ержет Жарылқасынға қандай сыйлық берілді

Тиранада күрес түрлерінен олимпиадалық емес салмақ дәрежелері бойынша өткен әлем чемпионатында күміс жүлдегер атанған Ержет Жарылқасынға Таразда көлік сыйға берілді.

Грек-рим күресінен 63 келіде финалға шыққан отандасымызға Жамбыл облыстық күрес федерациясының президенті Әлімбек Жұмабаев су жаңа Toyota Camry мінгізді. Ал оның жеке бапкеріне 3 млн теңге көлемінде ақшалай сыйлық берілді.

Ержет Жарылқасын 2000 жылы Жамбыл облысында дүниеге келген. Ол биыл ақпан айында Астанада өткен ел чемпионатында топ жарды. Ал сәуір айында Бішкекте Азия біріншілігінде жеңімпаз атанып, арасы жарты жыл салып Албанияда үздік нәтиже көрсетті.

Жамбылдық балуан әлем чемпионатында финалға дейін күрескен барлық қарсыласынан уақытынан бұрын ұтып, ерекше көзге түсті. Ал финалда Әзірбайжан балуанына 6:1 есебімен жол беріп, күміс жүлдеге ие болды.