Шавкаттың басты қарсыласы жаттығуға кірісті
Усман октагонға жақын арада оралып, қарсыласын аямайтынын айтты
Америкалық аралас жекпе-жек шебері Камару Усман Денверге келіп жетті. Бұл дегеніміз ол Тревор Уиттманның жаттығу залында даярлықты бастайды деген сөз. Усман өзінің Instagram-дағы парақшасында октагонға жақын арада оралып, қарсыласын аямайтынын айтты.
Бұған дейін Усман Майамиде дайындалды, алайда Шавкат екеуі екі уақытта жаттығып жүрген. Ал осыдан бірер күн бұрын екеуінің ортақ жаттығуынан видео тарады. Әдетте Камару Kill Cliff-ке маусым арасында ғана бас сұғып тұрады.
Шавкат журналист Ариэль Хельваниге берген сұхбатында UFC 310 аясында өзімен айқасқа басты үміткер ретінде дәл осы Усманды атаған. Жерлесіміз уақытша атаққа таласуға дайын екендігін жеткізді. Оның промоутері Саят Әбдірахманов та UFС-дің Камарумен келіссөздер жүргізіп жатқанын растады. Енді Дана Уайттың ресми мәлімдемесін күту ғана қалған тәрізді.