Сметовтің қарсыласы болған ресейлік дзюдошы ұлттық құрамаға қызметке келді
Ол Сметовпен 6 рет кездескен
Париж Олимпиадасынан кейін елімізде дзюдо құрамасын күшейту мақсатында білікті маман шақырылды. Енді ерлер құрамасына консультант ретінде ресейлік Роберт Мшвидобадзе жұмыс істемек.
Спорттағы мансабын аяқтаған бұл маман ертеректе Елдос Сметовтің қарымды қарсыластарының бірі болған. Ол Сметовпен 6 рет кездесіп, оның төртеуінде отандасымыз басым түскен еді.
Енді ресейлік дзюдо маманы Қазақстанда жұмысын жалғастырмақ. Ол бұған дейін Қытайдың әйелдер құрамасында табысты жұмыс істеді. Енді ол Қазақстан құрамасындағы француз мамандары Стефану мен Ксавьемен қатар балуандарды баптамақ.
Қазіргі уақытта ерлер құрамасын Нұрбол Сүлейменов баптаса, аға бапкер ретінде Ғайнолла Болатұлы, Еркебұлан Қосаев, Елдос Жұмақанов еңбек етеді. Ал әйелдер құрамасында Ерлан Алпысбаев бас бапкер, Ермек Нәсиев, Асылбек Шаханов аға бапкер ретінді нәзік жандыларды баптап жүр.