Токиодағы Гранд Слэмге барған 11 дзюдошының біреуі ғана жүлде үшін күреседі
Қалғандары түгел жеңіліп қалған
Дзюдодан Токио Гранд Слэмінің соңғы жарыс күнінде Қазақстан құрамасының өкілі қола жүлде үшін күресуге мүмкіндік алды.
-90 келіде ұлттық құрама мүшесі Максим Мейірлан айтулы жарыстың жүлдесі үшін жапон дзюдошысы Комеи Кавабатамен күш сынасады.
Отандасымыз алғашқы белдесуінде оңтүстіккореялық Ли Ном Банды ұтса, екінші белдесуінде Италия дзюдошысы Кристиан Парлатиді жеңді. Ал ширек финалда жапониялық Гоки Тажимаға жол берді.
Аталған салмақтың финалында Жапония және Грузия балуандары белдеседі.
Бұдан бөлек, бүгін татамиге шыққан 81 келіде Жалғас Қайролла алғашқы кездесуінде жапон спортшы Каито Аманодан ұтылса, -100 келіде Әділет Сапарғалиев Моңғолия спортшысынан айласын асыра алмады.
Әйелдер арасында Екатерина Такиева бірінші белдесуінде татами иесі Рури Таканишиге қарсы еш қауқар таныта алмады. Осылайша ұлттық құраманың 11 дзюдошысының арасынан тек біреуі ғана жүлде үшін күресуге мүмкіндік алып отыр.