БҚО әкімі Елдос Сметовті арнайы қабылдады
Дзюдошы өңірдегі спорт дамуымен және көрсеткіштерімен танысты
Олимпиада чемпионы Елдос Сметов Оралда Батыс Қазақстан облысының әкімі Нариман Төреғалиевтың қабылдауында болды. Бұл туралы жергілікті әкімдік мәлімдеді.
Белгілі болған мәлімет бойынша, кездесу барысында Олимпиада чемпионы өңірдегі спорт саласындағы жетістіктермен танысқаны айтылды.
Сондай-ақ, кездесуде облыс әкімі өз кезегінде Елдос Сметовке сәттілік тілеген. Алайда белгілі дзодошыға аймақ басшысының не сыйлағаны айтылмай, жұмбақ күйінде қалды. Себебі, жарияланған суретте танымал дзюдошының қолында ешқандай сыйлықтың белгісі байқалмады.
Бұдан бөлек, аталған кездесуде жүзу спортынан батысқазақстандық Анель Сыдықова да болған.
ТМД елдері арасында Антарктиданы алғаш жүзіп өткен қазақ қызы 750 метр қашықтықты 18 минутта бағындыруымен ерекшеленеді.
Елдос Сметов 27 шілде күні Париж Олимпиадасында 60 келіде сынға түсіп, чемпион атанды. Ол белдесу барысында Нидерланд, Украина, Тайпей спортшыларын ұтты. Жартылай финалға әлем чемпионы, испаниялық Гарригос Фрацисконы қосымша уақытта ұтты. Ал финалға жергілік француз спортшысы Лука Мхидзені негізгі уақытта вазари ұпайымен қапыда қалдырды.