Өзбекстан дзюдошысы Париждегі Гранд Слэм турнирінде чемпионы атанды

Парижде дзюдодан дәстүрлі Гранд Слэм турнирі басталды. Жарыстың алғашқы күнінде өзбекстандық Шахром Ахадов (73 кг) қарсылас шақ келтірмей, чемпион атанды.

Финалда Ахадов косоволық танымал балуан Акил Гяковпен белдескен болатын. Дзюдошылар негізгі уақытта жеңімпазды анықтай алмай, голден скорда өзбек спортшысының мерейі үстем болды.

Ахадовтан бөлек өзбектің тағы бір балуаны – Бахром Ботуров 60 келіде қола жүлдеге қол жеткізді.

Ал Қазақстан құрамасы наурызға дейін ешқандай халықаралық жарыстарға қатыспайды. Ұлттық құрама мүшелері 4 ақпанда Астанада оқу-жаттығу жиынын бастайды.