Моңғолия қазағы Жаннұр Көпжасар шахматтан халықаралық турнирдің чемпионы атанды
Ол кешегі қаңтарда Нидерландыда өткен ірі турнирде де жеңімпаз атанған болатын
Моңғолияда тұратын этникалық қазақ қызы Жаннұр Көпжасар Аустрияның Линц қаласында шахматтан әуесқойлар арасында өткен халықаралық турнирде топ жарды.
«2018 жылдан бері шахматпен әуесқойлар арасында ойнап келемін. Мақсатым — FIDE рейтингі бойынша нәтижемді жақсартып, Woman Candidate Master атағына қол жеткізу. Осы мақсатыма жету үшін қаңтар айынан бастап Еуропа елдерінде сайыстарға қатысып жатырмын», - дейді Жаннұр Көпжасар.
Ол биыл қаңтар айында Нидерландының Wijk aan Zee қаласында өткен турнирде де жеңімпаз атанған болатын. Жаннұр ол кезде барлығы 9 ойын өткізіп, 8-де жеңіп, 1-де тең түсіп, ең жоғары көрсеткішке қол жеткізген.
Жаннұр Көпжасар Моңғолияның Баян-Өлгий қаласында дүниеге келген. Қазіргі таңда «Tata Steel Chess» классикалық форматы бойынша келесі кезеңге дайындалып жатыр.