«Сен қорқақсың»: Жәнібек Әлімханұлы өзінен қашып жүрген чемпионға сес көрсетті
Карлос Адамес Хамза Ширазбен жекпе-жекте WBC титулын сақтап қалды
Қазақстандық боксшы Жәнібек Әлімханұлы доминикандық Карлос Адамес (24-1-1, 18 КО) пен британдық Хамза Шираз (21-0-1, 17 КО) арасындағы жекпе-жектің нәтижесіне эмоционалды түрде реакция білдірді.
«Бұл не болғаны? Карлос? Сен қорқақсың! Мен сені нокаутқа түсіремін! Бірақ сен жекпе-жектен қашасың. Рафаэль, өз боксшыңа менімен жұдырықтассын деп айт! Егер сен чемпион болсаң, чемпиондармен айқас! Сен қорқақсың! Сенде ауыр соққы жоқ! Мен сені оңай нокаутқа жіберемін!» – деп жазды Әлімханұлы X әлеуметтік желісінде.
Еске сала кетейік, Сауд Арабиясының Эр-Рияд қаласында өткен Карлос Адамес пен Хамза Шираз арасындағы жекпе-жек күтпеген нәтижемен аяқталды. Екі боксшының тең өнер көрсетуі көрермендердің наразылығын тудырды.
Бұл айқаста фаворит деп саналған Шираз болғанымен, Адамес өз салмағындағы WBC тұжырымы бойынша әлем чемпионы титулын сақтап қалды. Осылайша, енді дәл осы доминикандық боксшы Әлімханұлының келесі қарсыласы болуы мүмкін.