Жеті жылдан бері жеңіліп көрмеген жапон феномені Акари Фудзинами жаңа салмаққа ауысты
Оның жеңіліссіз сериясы 140 белдесуге жетті
Қыздар күресінен Олимпиада және әлем чемпионы – жапон феномені Акари Фудзинами жаңа салмаққа ауысатынын мәлімдеді. Бұған дейін балуан қыз 53 келіде өнер көрсетіп келген.
«Келесі жарыстан бастап мен 57 келі салмақта күресетін боламын. Мені алда бұрынғыдан да қиын кезең күтіп тұр. Дұрыс шешім қабылдағаныма сенімдімін және алдағы уақытта күштірек болып ораламын.
Сіздердің қолдауыңыз әрқашанда маңызды. Мені ары қарай да қолдайтындарыңызға сенемін», - деп жазды Фудзинами өзінің Instagram-парақшасында.
Акари Фудзинами қараша айында 22 жасқа толады. Жастығына қарамастан ол талай биікті бағындырған. Атап айтқанда, Париж Олимпиадасында чемпионы атанды. Сондай-ақ, 2 дүркін әлем және 2 дүркін Азия чемпионы болды. Азия ойындарының жеңімпазы.
Талантты балуанның статистикасы ерекше. Ол қатарынан 37 (23 отандық, 14 шетелдік) жарыста мүлдем жеңілмей, жеңімпаз атанды. 2017 жылдың қыркүйегінде жасөспірімдер арасындағы орта мектеп чемпионатының финалында жеңілгеннен соң ешкімге есе жібермеген. Оның жеңіліссіз сериясы – 140 белдесу.
Фудзинами соңғы рет 2024 жылы студенттер арасындағы Жапония чемпионатында 57 келіде бақ сынаған. Жаңа салмақта ол 3 белдесу өткізіп жеңіске жеткен.
Жалпы, күрес тарихында жеңіліссіз серияның рекордты – 189 белдесу. Бұл рекорд та жапон балуанына – Каори Итёға тиесілі.