Александр Усик абсолютті әлем чемпионы атағын қайтарып алмақ
Усик британиялық Даниэль Дюбуамен кездеседі
Ауыр салмақта үш чемпиондық белбеу иесі, украиналық Александр Усик британиялық Даниэль Дюбуамен кездеседі.
The Ring басылымының мәліметінше, абсолютті чемпион атағы үшін сарапқа салынатын бұл кездесу 12 шілде күні Лондондағы әйгілі «Уэмбли» стадионында өтеді. WBO, WBA және WBC тұжырымдары бойынша үш белбеудің иесі Александр Усик бұл жолы Даниэль Дюбуаға тиесілі IBF нұсқасы бойынша төртінші белбеу үшін бақ сынамақ.
Айта кетейік, бұған дейін Усик британиялық Тайсон Фьюримен алғашқы кездесуінен кейін-ақ «абсолютті чемпион» атанған. Алайда кейін IBF белбеуінен бас тартып, бұл титул Дюбуа мен Энтони Джошуа арасындағы жекпе-жекте сарапқа салынды. Сол кездесуде Дюбуа жеңіске жетіп, IBF тұжырымы бойынша толыққанды чемпион атанды.
Усик пен Дюбуа бұған дейін 2023 жылы да шаршы алаңда кездескен. Ол кезде Усик тоғызыншы раундта Дюбуаны нокаутқа түсірген еді.
Украиналық боксшы соңғы жекпе-жегін былтырғы желтоқсан айында өткізді. Бұл Тайсон Фьюриге қарсы өткен қарымта кездесу еді. Усик бұл жекпе-жекте сенімді түрде жеңіске жетті.