Мөлдір Жаңбырбай Мысырдағы турнирдің чемпионы атанды
Тағы төрт каратеші жүлде үшін таласады
Мысыр астанасы Каир қаласында Karate 1-Premier League турнирлік сериясының үшінші кезеңі өтіп жатыр.
Кумитэ бөлімінде 50 келіге дейінгі салмақ дәрежесінің финалында қазақстандық танымал каратеші Мөлдір Жаңбырбай мен хорватиялық Эмма Сгарделли кездесті. Жекпе-жек Мөлдір Жаңбырбайдың жеңісімен аяқталды — ол шешуші ұпайды айқастың соңғы секундтарында еншілеп, алтын медаль жеңіп алды.
Айта кетейік, бүгін тағы төрт қазақстандық каратеші Премьер-лига кезеңінде кумитэ бойынша жүлделі орындар үшін бақ сынайды:
- Айжан Бакирова (61 кг),
- Диас Анарбеков (84 кг)
- Софья Берульцева (68 кг) — қола медаль үшін күреседі,
- Әсел Қанай (61 кг дейін) украиналық Александра Шолоховамен алтын медальді сарапқа салады.
Мөлдір Жаңбырбай 1997 жылдың 18 мамырында дүниеге келген. Қорқыт ата атындағы Қызылорда университетінің түлегі.
Ол – Қазақстан чемпионаттары мен спартакиадаларының, республикалық және халықаралық додалардың бірнеше дүркін жеңімпазы. Сонымен қатар Азияның үш дүркін чемпионы (2013, 2017, 2018). Халықаралық дәрежедегі спорт шебері.
Каратеден әлем чемпионы, сондай-ақ 2022 жылы Ханчжоуда өткен XIX жазғы Азия ойындарының финалисі.