Волейбол федерациясының логотипінде қазақша сөз қате жазылған – журналист

Спорт журналисі Эльдар Аманбаев Қазақстан волейбол федерациясының логотипіндегі жазуға қатысты пікір білдірді. Оның айтуынша, логотип астындағы мәтінде қазақ тілі нормасына сай келмейтін қате кеткен.

Журналист бірнеше сағат бойы логотипті қарап, ондағы «ҚазақстанДЫҚ волейбол федерациясы» деген жазуға күмән келтіргенін айтты.

«Құрметті оқырмандар! Арамызда филолог мамандар бар ма? Мен өзім де ана тілімді жаман меңгермегенмін, дегенмен сіздермен ақылдасқым келеді. Федерацияның жаңа логотипіне және оның астындағы жазуға бірнеше сағат қарадым. Бір нәрсе дұрыс емес сияқты, бірдеңесі жетіспейтіндей әсер қалдырды. Сосын кенеттен ойыма түсті: менің субъективті пікірім бойынша, ол жерде қате бар! Онда «ҚазақстанДЫҚ волейбол федерациясы» деп жазылған. Қазақ тілінде мұндай жалғауды қолдану дұрыс емес. Дұрыс нұсқасы — «Қазақстан волейбол федерациясы». Бұл «Казахстанская федерация волейбола» деген тіркесті тікелей аударғаннан шыққан калькаға көбірек ұқсайды. Мен бұл ойымды филолог таныстарыммен де бөлістім, олар да күмәнімнің орынды екенін растады. Сол себепті, бәрі байқап үлгермей тұрып, жазуды өзгертулеріңізді сұраймын. Бұл да сіздерге менен қосымша көмек болсын», – деп жазды журналист.

Айта кетейік, маусым айында волейбол федерациясындағы дау туралы жазған едік. Федерацияның вице-президенті төрешінің басын жарғаны туралы толығырақ баяндадық.